طقطقوادى واسمعواده

طقطقوادى واسمعواده
طقطقوادى واسمعواده ..كلامى مش قصايد منشوده
حقول كلامى بالعامية ..قصدى يعنى بالمصرية
وبلهجتى الاسكندرانية
كلامى حقولوا من قلبى ليكوا
حاجات بتحصل لى وليكوا
زى اللى بيقول حينفيكوا
ويوصلكم لباب خروجكم م الدنيا والبلد اللى فيها
خيرها ماليها ويفيض للى ييجى فيها
بطلوا ده تسمعوا ده كلام اللى يوسوسولكوا
ويقولولكوا البلد فاضية وملكش فيها
البلد دى بتشيل اللى يخاف عليها ويضحى ليها
فيها يصلى مسيحى ومسلم الرب واحد
كان صاحبى لا ده كان اخويا
وكانوا يعرفوه امى وابويا
سافر مع اللى البحر خدهم..مننا للى اغلى منهم
ورجعلنا ف صندوق خشب وكتبتها اغنيه ليه
بسمعها لما اكون عايز اشوفه وادعي ليه
طقطقوا دى واسمعوا ده
وياريت تخافوا على اخواتكم
او حتى خافوا على جيل بلدكم
اللى عقولهم لسه طازة
بيدمروها بكام ازازة
وياتلحقوهم ف الاجازة..ياتخرجوهم م المغازة
لو كان باقى حد فيهم
بطلوا بقى تسمعوا..كل اللى يرطم وتصدقوا
وتعشموا ف حاجة م اللى قال عليها
شوفت ام عايشة حياتها بين الاموات
وبتقول عيشيتها فل ومن سكات
ربت ولادها وبتربى والله ولاد ولادها
ام ف عيونها رجالة جامدة متحملين
ايدها بتصونها وبتقول حامدة متشكرين
شوفتوا البساطة والابتسامة ودموعها اللى من دهب
شوفتوا المتانة كرامة متصانة وعقلها اللى يوزن دهب
ايه خلاص بقت قلوبنا زى الحجر..ايه خلاص مابتشوفش عينا غير القمر
طب سيبكوا من دى وطقطقوا دى واسمعوا ده...
فى يوم جالى مطرب وقاللى وحياة عيالى اكتبلى غنوة متدلعة
بصتله بضحك .. قاللى حقولك انا افييه وتكتبلى انت كوبليه
وسينيوا جامد مع التوزيع والغنوة تخلص ف السريع
وكليب جامد ف الخليع..
اتعجب لما رفضت ده..وقولتله انا مش كده
قاللى بص هو ده الفن فى الزمن ده
قولتله لآ انت غلطان..ده مش فن ولا اطران
هو كل من غنى وقال اسمه فنان
سكت..وكان رد فعله ف كلمتين
قاللى ده انت محصلتش حتى شاعر بشطرتين
قولتله تشكر يانجم الجير يافنان ياموهبة
يااللى مابتفرقش كتير عن حنان او هبه
واتضايقت لما لقيت مفيش ف زماننا حد نسمعوا
ومهما قولت او حكيت حيطبلوا ويرزعوا
وكل اللى عملوا بوستر وعمله اغنية ماستر وقال انه الموهبة
يطلع ف كليب عنتر وكليب تانى متمختر والناس متعذبة
ايوووه بقى بطلوا تجاملوا اللى بتسمعوا
ايوووه لو تقولوا رأيكوا بجد ليبطلوا
زهقت من كتر الكلام..واللى بنشوفوا ف الافلام
عارفين ده وحقيقة ده..وساكتين ليه كل ده
طقطقطوا دى وسمعتوا ده
ده كان كلامى وخلاص كده
......
MoHaMeD RoM!o Elsha3er